ហាណូយ ប្រទេសវៀតណាម (២២ មករា ២០២១) – កាលពីម្សិលមិញ Google Arts & Culture បានដាក់ដំណើរការ «អច្ឆរិយៈនៃប្រទេសវៀតណាម» (Wonders of Vietnam) ដែលជាគម្រោងអនឡាញមួយបង្ហាញពីភាពលេចធ្លោជាច្រើននៃតំបន់បេតិកភណ្ឌពិភពលោករបស់អង្គការ UNESCO នៅក្នុងប្រទេសវៀតណាមជាលើកដំបូង រួមទាំងតំបន់ធម្មជាតិ និងបេតិកភណ្ឌរូបី និងអរូបី។ ដោយសហការរៀបចំជាមួយក្រសួងវប្បធម៌ កីឡា និងទេសចរណ៍ អគ្គនាយកដ្ឋានទេសចរណ៍ជាតិវៀតណាម  មន្ទីរទេសចរណ៍ក្នុងតំបន់នៃទីក្រុងដាណាំង (Da Nang), ក្វាងណាម (Quang Nam), ធឿធានហ្វេ (Thua Thien Hue) និងក្វាងប៊ិញ (Quang Binh) រួមជាមួយអ្នកថតរូបជ័យលាភីពានរង្វាន់ National Geographic លោក Tran Tuan Viet និង Oxalis Adventure គម្រោងថ្មីនេះមានគោលបំណងផ្តិតយក និងថែរក្សាសម្រស់របស់ប្រទេសវៀតណាមសម្រាប់ទស្សនិកជនទូទាំងពិភពលោក។ 

គម្រោងអនឡាញនេះមានការតាំងពិពណ៌ចំនួន ៣៥ និងរូបភាពដ៏ស្រស់ស្អាតចំនួន ១,៣៦៩ សន្លឹក ដោយនាំមកនូវទិដ្ឋភាពដ៏សម្បូរបែបនៃប្រទេសវៀតណាមសម្រាប់មនុស្សគ្រប់គ្នាក្នុងការផ្សារភ្ជាប់ទំនាក់ទំនងក្នុងអំឡុងពេល និងក្រោយពេលមានជំងឺរាតត្បាត។ ចំណុចលេចធ្លោរួមមានការតាំងពិពណ៌អំពីល្អាងភ្នំ Son Doong, ពិធីបុណ្យបង្ហោះគោម Hoi An និងតន្ត្រីវាំង Nha Nhac ព្រមទាំងមុខងារអន្តរកម្មដែលអនុញ្ញាតឱ្យអ្នកទស្សនាទទួលបានបទពិសោធន៍ពីអច្ឆរិយៈនៃប្រទេសវៀតណាមក្នុងទម្រង់បែបថ្មី។ មនុស្សគ្រប់គ្នាអាចស្វែងយល់ពីចំណុចលេចធ្លោនៃការតាំងពិពណ៌តាមរយៈពណ៌ ទស្សនាវីដេអូនានានៃតំបន់ទេសចរណ៍ដែលអមដោយតន្ត្រីប្រពៃណីវៀតណាម ឬមើលទិដ្ឋភាពពីលើអាកាសនៃតំបន់ល្បីៗតាមរយៈរូបភាពបែបប៉ាណូរ៉ាម៉ា។ គម្រោងនេះគឺជាផ្នែកមួយដ៏សំខាន់នៃការគាំទ្រទូទៅរបស់ Google ដល់ឧស្សាហកម្មទេសចរណ៍ក្នុងស្រុក ដែលបានរងផលប៉ះពាល់យ៉ាងធ្ងន់ធ្ងរដោយសារការរឹតបន្តឹងការធ្វើដំណើរដោយសារជំងឺរាតត្បាត។ តាមរយៈការបង្ហាញពីអច្ឆរិយៈនៃប្រទេសវៀតណាម ជាពិសេសមកពីតំបន់កណ្តាល យើងសង្ឃឹមថានឹងជួយបង្កើនការយល់ដឹងអំពីការអភិរក្សតំបន់នានាដែលរងផលប៉ះពាល់ដោយសារគ្រោះទឹកជំនន់នាពេលថ្មីៗនេះផងដែរ។ 

«ដោយសារតែឧស្សាហកម្មទេសចរណ៍ទូទាំងពិភពលោក និងជាពិសេសនៅក្នុងប្រទេសវៀតណាម បានរងផលប៉ះពាល់យ៉ាងធ្ងន់ធ្ងរដោយសារជំងឺរាតត្បាត យើងដឹងថាវាពិតជាមានសារៈសំខាន់ខ្លាំងណាស់ក្នុងការធ្វើឱ្យគម្រោង Wonders of Vietnam អាចចូលមើលបានពីគ្រប់ទិសទីលើពិភពលោក ដើម្បីឱ្យមនុស្សកាន់តែច្រើនអាចទទួលបានបទពិសោធន៍ និងស្គាល់កាន់តែច្បាស់អំពីប្រទេសវៀតណាម» លោក  Amit Sood នាយកកម្មវិធី Google Arts & Culture បានមានប្រសាសន៍។ «ខ្ញុំមានអំណរគុណចំពោះដៃគូរបស់យើងសម្រាប់ការសហការជាមួយពួកយើងក្នុងការបង្ហាញនូវទិដ្ឋភាពដ៏សម្បូរបែបនៃតំបន់ទេសចរណ៍ និងវប្បធម៌របស់ប្រទេសវៀតណាម។» 

លោក Ha Van Sieu អនុប្រធានអគ្គនាយកដ្ឋានទេសចរណ៍ បានមានប្រសាសន៍ថា៖ «ការលើកកម្ពស់ការផ្លាស់ប្តូរឌីជីថល ការបង្កើនការអនុវត្តបច្ចេកវិទ្យាក្នុងការផ្សព្វផ្សាយពាណិជ្ជកម្ម គឺជាទិសដៅដ៏សំខាន់មួយនៃឧស្សាហកម្មទេសចរណ៍វៀតណាម ដើម្បីចូលទៅជិត និងចូលរួមយ៉ាងសកម្ម និងមានប្រសិទ្ធភាពក្នុងបដិវត្តន៍ឧស្សាហកម្មទី៤។ អគ្គនាយកដ្ឋានទេសចរណ៍វាយតម្លៃខ្ពស់ចំពោះគំនិតផ្តួចផ្តើមរបស់ Google ក្នុងការអនុវត្តគម្រោងតាំងពិពណ៌អនឡាញ Wonders of Vietnam ដោយបង្ហាញពីលក្ខណៈលេចធ្លោនៃបេតិកភណ្ឌ វប្បធម៌ និងម្ហូបអាហាររបស់វៀតណាម។ ក្នុងនាមជាវេទិកាអនឡាញសកល Google Arts & Culture នឹងក្លាយជាស្ពានចម្លងជួយផ្សព្វផ្សាយសម្រស់របស់ប្រទេសវៀតណាមឱ្យកាន់តែទូលំទូលាយ ទៅដល់ទស្សនិកជន និងភ្ញៀវទេសចរទូទាំងពិភពលោក។ ខ្ញុំសង្ឃឹមថាគម្រោងនេះនឹងត្រូវបានផ្សព្វផ្សាយយ៉ាងទូលំទូលាយ និងពង្រីកបន្ថែមទៀតនៅក្នុងដំណាក់កាលបន្ទាប់»។

### 

អំពី Google Arts & Culture 

Google Arts & Culture នាំយកការប្រមូលផ្តុំនៃសារមន្ទីរជាង ២,០០០ មកដាក់នៅចុងម្រាមដៃរបស់អ្នក។ វាគឺជាវិធីដ៏ជក់ចិត្តមួយដើម្បីស្វែងយល់អំពីសិល្បៈ ប្រវត្តិសាស្ត្រ និងអច្ឆរិយៈនានារបស់ពិភពលោក ចាប់ពីគំនូរបន្ទប់គេងរបស់លោក Van Gogh រហូតដល់ចលនាសិទ្ធិនារី និងវិមាន Taj Mahal។  កម្មវិធី Google Arts & Culture គឺឥតគិតថ្លៃ និងមាននៅលើអនឡាញសម្រាប់ប្រព័ន្ធប្រតិបត្តិការ iOS និង Android។  ក្រុមការងារនេះគឺជាដៃគូច្នៃប្រឌិតសម្រាប់ស្ថាប័នវប្បធម៌តាំងពីឆ្នាំ ២០១១។ ពួកគេបង្កើតបច្ចេកវិទ្យាដែលជួយអភិរក្ស និងចែករំលែកវប្បធម៌ ព្រមទាំងអនុញ្ញាតឱ្យអ្នករៀបចំការតាំងពិពណ៌បង្កើតការតាំងពិពណ៌ដែលទាក់ទាញទាំងតាមអនឡាញ និងផ្ទាល់នៅក្នុងសារមន្ទីរ។ 

---