នៅប្រទេសវៀតណាម យើងមិនត្រឹមតែញ៉ាំរបស់ឆ្ងាញ់ៗប៉ុណ្ណោះទេ។ យើងញ៉ាំដើម្បីសុខភាពល្អ។ ការទទួលបានអាហារដែលមានរសជាតិឆ្ងាញ់ និងមានជីវជាតិ គឺជាប្រភពនៃក្តីសុខជានិច្ចកាលសម្រាប់ប្រជាជនវៀតណាម។ គ្រឿងផ្សំស្រស់ៗពីកសិដ្ឋានតាមជនបទ សមុទ្រដ៏សម្បូរបែប និងព្រៃតំបន់ក្ដៅរបស់ប្រទេសវៀតណាម តែងតែមានវត្តមាននៅលើតុអាហារទូទាំងប្រទេសជារៀងរាល់ថ្ងៃ។ ហើយយើងសូមស្វាគមន៍អ្នកក្នុងការចូលរួមទទួលទានអាហារដ៏អស្ចារ្យទាំងនេះ។ ខាងក្រោមនេះជាគ្រឿងផ្សំជំនួយសុខភាពដ៏ប្លែកៗមួយចំនួន ដែលយើងចូលចិត្តញ៉ាំនៅក្នុងប្រទេសវៀតណាម។ 

---

ផ្កា Điên điển នៅ Châu Đốc

ដៃទន្លេមេគង្គមួយហូរកាត់ Châu Đốc ដោយផ្តល់ជីវិតដល់ទីក្រុងព្រំដែននេះនៅជើងភ្នំ Sam។ នៅពេលព្រឹក ក្រុមប្រជាកសិករភ្ញាក់តាំងពីព្រលឹមដើម្បីប្រមូលផលផ្កា điên điển ពណ៌លឿងភ្លឺ។ ផ្កាដ៏ស្រស់ស្អាតទាំងនេះគឺជាអាហារបន្សាបជាតិពុលដ៏អស្ចារ្យ។ ផ្កា điên điển ស្រស់មួយបាច់អាចជួយឱ្យរាងកាយត្រជាក់ ជួយឱ្យចង់អាហារ និងសម្រាលអារម្មណ៍ដែលមិនស្ងប់។ ផ្កា điên điển ច្រើនតែត្រូវបានគេយកទៅញ៉ាំជាមួយត្រីទឹកសាប។ ស្រូបទឹកស៊ុបនំបញ្ចុកត្រីដ៏ល្បីល្បាញរបស់ Châu Đốc មួយចាន ឬជួបជុំគ្នាជុំវិញឆ្នាំងភ្លើងត្រី និងបន្លែដ៏ក្តៅហុយៗ។

---

មាន់នាគនៅ Đông Tảo

ខុសពីសត្វនាគក្នុងរឿងព្រេងនិទានរបស់វៀតណាម មាន់នាគនៅ Đông Tảo ដែលជាទីប្រជុំជនតូចមួយនៅភាគខាងជើងប្រទេសវៀតណាម គឺជាប្រភពប្រូតេអ៊ីនពិតប្រាកដដែលសំបូរទៅដោយវីតាមីន។ សាច់របស់វាហាប់ណែនជាងបក្សីស្រុកធម្មតា ហើយសត្វស្លាបទាំងនេះក៏មានផ្ទុកកូឡេស្តេរ៉ុលតិចជាងផងដែរ។ នៅក្នុងប្រទេសវៀតណាម ការបរិភោគមាន់នាគដែលចិញ្ចឹមតាមកសិដ្ឋានត្រូវបានគេនិយាយថាអាចកាត់បន្ថយភាពតានតឹង និងជួយឱ្យគេងលក់ស្រួល។ មាន់នាគ Đông Tảo គឺល្អបំផុតក្នុងការចំអិនដោយប្រើវិធីសាមញ្ញៗ។ សាច់ណែនតែទន់ រួមជាមួយស្បែកស្រួយឆ្ងាញ់ មាន់នាគអាំង ឬចំហុយមួយចានជាមួយស្លឹកក្រូចសើច គឺជាអាហារដ៏ឆ្ងាញ់ពិសាជាមួយបាយ និងបន្លែ។ 

---

ម្រះនៅ Long An

តំបន់ដីសណ្តទន្លេមេគង្គដ៏ខៀវស្រងាត់ គឺជាប្រភពនៃបន្លែស្រស់ៗបំផុតរបស់ប្រទេសវៀតណាម។ តំបន់មាត់ទន្លេរបស់ខេត្ត Long An ដែលសម្បូរទៅដោយល្បាប់ភក់ គឺល្អបំផុតសម្រាប់ការដាំដុះដំណាំដែលមានជីវជាតិ រួមទាំងអាហាររូបត្ថម្ភដ៏អស្ចារ្យប្រចាំតំបន់ គឺផ្លែម្រះ។ បន្លែដែលសម្បូរទៅដោយវីតាមីន និងជួយពង្រឹងប្រព័ន្ធការពាររាងកាយនេះ មានលក្ខណៈត្រជាក់ និងជួយសម្អាតប្រព័ន្ធរំលាយអាហារ។ ម្រះមានរសជាតិដែលទាមទារការស៊ាំក្នុងការទទួលទាន។ ប៉ុន្តែចុងភៅនៅតំបន់ដីសណ្តទន្លេមេគង្គបានរកឃើញវិធីបញ្ចូលគ្រឿងផ្សំនេះទៅក្នុងមុខម្ហូបផ្សេងៗ ដូចជាស៊ុបម្រះ និងម្រះញាត់សាច់។

---

ដំឡូងជ្វាទឹកឃ្មុំនៅ Đà Lạt

រាត្រីដ៏ត្រជាក់នៅទីក្រុង Đà Lạt គឺស័ក្តិសមបំផុតសម្រាប់ដំឡូងជ្វាទឹកឃ្មុំអាំងលើភ្នក់ភ្លើងក្តៅៗ។ ដំឡូងជ្វាសម្បូរទៅដោយវីតាមីន និងជាតិសរសៃ ជួយការពារផ្លូវរំលាយអាហាររបស់អ្នក សម្រួលកម្រិតជាតិស្ករក្នុងឈាម និងផ្តល់ជាតិម៉ាញេស្យូមយ៉ាងច្រើនដល់រាងកាយ។ ខណៈពេលដែលប្រជាជនវៀតណាមនៅទូទាំងប្រទេសចូលចិត្តដំឡូងជ្វាចំហុយ ដំឡូងជ្វាទឹកឃ្មុំអាចរកទិញបានក្តៅៗភ្លាមៗពីចង្រ្កានអាំងនៅតាមតូបជុំវិញផ្សារកណ្តាលក្រុង Đà Lạt។ គ្រាន់តែខាំមួយម៉ាត់ទៅលើដំឡូងជ្វាទឹកឃ្មុំ (khoai lang mật) ដ៏ទន់ និងមានជាតិក្រែម នោះអ្នកនឹងយល់ច្បាស់ថាហេតុអ្វីបានជាអ្នកស្រុកដាក់ឈ្មោះវាថាជាដំឡូងជ្វា 'ទឹកឃ្មុំ'។ 

---

ផ្លែប៊ឺ Maluma នៅ Đắk Lắk 

ដើមប៊ឺ Maluma ដុះលូតលាស់យ៉ាងល្អនៅលើដីបាសាល់ពណ៌ក្រហមនៃខេត្ត Đắk Lắk នៅភាគកណ្តាលប្រទេសវៀតណាម។ លក្ខខណ្ឌអាកាសធាតុប្លែកពីគេ និងសមាសធាតុរ៉ែធ្វើឱ្យផ្លែប៊ឺទាំងនេះមានជីវជាតិខ្ពស់ និងមានរសជាតិឆ្ងាញ់ ដែលជាមោទនភាពយ៉ាងខ្លាំងសម្រាប់កសិករក្នុងស្រុក។ សម្បូរទៅដោយជាតិហ្វូឡាត វីតាមីនសំខាន់ៗ និងអាស៊ីតខ្លាញ់ ផ្លែប៊ឺ Đắk Lắk គឺជាកាដូពីធម្មជាតិសម្រាប់អ្នករស់នៅតំបន់ខ្ពង់រាប និងភ្ញៀវទេសចរ។ មកកម្សាន្តនៅ Đắk Lắk ចន្លោះខែឧសភា ដល់ខែសីហា ដើម្បីទស្សនារដូវផ្លែប៊ឺ។ យកស្លាបព្រាមកដួសសាច់ប៊ឺដ៏ទន់ល្មើយដូចក្រែមចេញពីសំបករបស់វា ហើយបណ្តោយឱ្យវារលាយនៅលើចុងអណ្តាតរបស់អ្នក។ 

---

មីសួរមើមព្រួញនៅ Cao Bằng

មីសួរគឺជាអាហារដ៏ល្អបំផុតសម្រាប់អ្នកដែលចង់សម្រកទម្ងន់។ សរសៃមីសួរឆ្មារៗទាំងនេះមានកាឡូរីទាប មានជាតិខ្លាញ់តិចតួច ឬគ្មានទាល់តែសោះ ហើយវាជាជម្រើសដ៏ល្អសម្រាប់អ្នកដែលចង់កាត់បន្ថយការទទួលទានកាបូអ៊ីដ្រាត។ ផលិតឡើងពីមើមព្រួញ miến dong គឺគ្មានជាតិគ្លុយតេន និងសំបូរទៅដោយជាតិសរសៃ។ មីសួរខេត្ត Cao Bằng នេះនឹងជួយឱ្យការរំលាយអាហាររបស់អ្នកដំណើរការល្អ ខណៈពេលដែលផ្តល់ថាមពលពេញមួយថ្ងៃ។ ស្វែងយល់ពីប្រភពដើមនៃ miến dong នៅលើភ្នំ Phia Đén ដ៏ស្រស់ស្អាត ដើម្បីដឹងពីរបៀបដែលអ្នកស្រុកផលិតមីសួរនេះ តាមរយៈដំណើរការដ៏ផ្ចិតផ្ចង់ជាច្រើនដំណាក់កាល។ 

---

មើមឈូកនៅ Huế 

ផ្កាតំណាងជាតិរបស់វៀតណាមមានអត្ថប្រយោជន៍លើសពីអ្វីដែលភ្នែកមើលឃើញទៅទៀត។ ចាប់ពីគ្រាប់រហូតដល់ស្រទាប់ផ្កា គ្រប់ផ្នែកទាំងអស់នៃផ្កាឈូកដ៏ស្រស់ស្អាតអាចយកទៅប្រើប្រាស់ក្នុងការចម្អិនអាហារបាន។ នៅក្នុងទីក្រុង Huế ដែលជាអតីតរាជធានីបុរាណ មើមឈូកធ្លាប់ត្រូវបានគេយកទៅចម្អិនសម្រាប់ព្រះមហាក្សត្រ និងមហេសី។ មើមឈូកត្រូវបានគេស្គាល់ថាជួយជម្រុញចរន្តឈាម ធ្វើឱ្យចិត្តស្ងប់ និងចិញ្ចឹមស្បែក និងសក់។ នៅក្នុងប្រទេសវៀតណាម ក្រអៅឈូកច្រើនតែត្រូវបានគេយកទៅធ្វើជាញាំជាមួយជីរផ្សេងៗ។ នៅពេលទៅដល់ Huế សូមចាក់តែក្រឡុកក្តៅៗមួយពែង និងញ៉ាំដំណាប់មើមឈូកជាអាហារសម្រន់ដ៏ផ្អែមឆ្ងាញ់ នៅថ្ងៃរដូវក្តៅដ៏ស្រណុកសុខស្រួល។ 

---

ចង់បានគំនិតធ្វើដំណើរទៅប្រទេសវៀតណាមបន្ថែមទៀតទេ? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតនៅក្នុងប្រអប់សំបុត្ររបស់អ្នក។