ប្រទេសវៀតណាមកំពុងទទួលបានការចាប់អារម្មណ៍យ៉ាងខ្លាំងនៅក្នុងវិស័យទេសចរណ៍ ហើយពិតជាគោលដៅទេសចរណ៍ដ៏គួរឱ្យចង់ទៅសម្រាប់ការមុជទឹកស្គូបាដ៏អស្ចារ្យ។

ក្រៅពីមានម្ហូបអាហារដ៏ឆ្ងាញ់ពិសា និងទេសភាពដ៏ស្រស់ស្អាត ប្រទេសវៀតណាមក៏អំណោយផលទៅដោយជីវចម្រុះដ៏សម្បូរបែប និងទេសភាពធម្មជាតិដ៏ត្រកាលផងដែរ។ ប្រជាជនក្នុងតំបន់តែងតែស្វាគមន៍ភ្ញៀវទេសចរដោយភាពកក់ក្តៅ និងភាពស្និទ្ធស្នាលបំផុត។ តំបន់ទេសចរណ៍លាក់ខ្លួន និងទីតាំងមុជទឹកដែលមិនគួររំលងនឹងត្រូវលាតត្រដាងនៅក្នុងអត្ថបទនេះ។

---

ដោយសារប្រទេសវៀតណាមមានឆ្នេរសមុទ្រប្រវែងរាប់ពាន់គីឡូម៉ែត្រ ប្រទេសនេះមានកន្លែងមុជទឹកប្លែកៗជាច្រើន។ ចាប់ពីប៉ប្រះទឹកផ្កាថ្មដ៏រស់រវើកដែលពោរពេញទៅដោយជីវិតក្រោមបាតសមុទ្រ រហូតដល់ទម្រង់ផ្ទាំងថ្មដ៏អស្ចារ្យ និងព្រៃលិចទឹក ទេសភាពក្រោមបាតសមុទ្រពិតជាគួរឱ្យជក់ចិត្តដិតអារម្មណ៍ខ្លាំងណាស់។ ពិភពក្រោមបាតសមុទ្រគឺជាជម្រកនៃប្រភេទសត្វសមុទ្រចម្រុះជាច្រើនប្រភេទ ដូចជាត្រីតំបន់ត្រូពិច អណ្តើកសមុទ្រដ៏ស្រស់ស្អាត ជ្រូកទឹក (dugong) និងសេះសមុទ្រ ដែលការមុជទឹកស្គូបានៅទីនេះគឺជាបទពិសោធន៍ដ៏អស្ចារ្យមួយ ហើយប្រាកដជាធ្វើឱ្យអ្នកស្ញប់ស្ញែងមិនខាន។

ជាមួយនឹងហេដ្ឋារចនាសម្ព័ន្ធទំនើប និងមានគុណភាពខ្ពស់ រមណីយដ្ឋានជាច្រើននៅតាមបណ្តោយទីក្រុងជាប់ឆ្នេរសមុទ្រនៃប្រទេសវៀតណាម បានផ្តល់សេវាកម្មមុជទឹកយ៉ាងសម្បូរបែប។ ចាប់ពីអ្នកទើបតែចាប់ផ្តើមដំបូងរហូតដល់អ្នកជំនាញដែលមានបទពិសោធន៍ អ្នកអាចចូលរួមការមុជទឹកដោយមានអ្នកណែនាំ។ ជាមួយនឹងសីតុណ្ហភាពអំណោយផល និងកម្រិតមើលឃើញច្បាស់ល្អ ភាពអស្ចារ្យនៃពិភពក្រោមបាតសមុទ្រនឹងបង្ហាញឡើងយ៉ាងស្រស់ត្រកាលនៅចំពោះមុខអ្នកមុជទឹក។

 

 

ញ៉ាត្រាង

ស្ថិតនៅលើឆ្នេរសមុទ្រភាគកណ្តាលភាគខាងត្បូងនៃប្រទេសវៀតណាម ពេលវេលាដ៏ល្អបំផុតដើម្បីទទួលយកបទពិសោធន៍មុជទឹកស្គូបានៅទីនេះគឺចាប់ពីខែកុម្ភៈដល់ខែតុលា។ អាកាសធាតុក្នុងអំឡុងពេលនេះគឺក្តៅល្មម ហើយសមុទ្រមានសភាពស្ងប់ស្ងាត់។ ញ៉ាត្រាងល្បីល្បាញដោយសារប៉ប្រះទឹកផ្កាថ្មដ៏ស្រស់ស្អាត ត្រីត្លុក (clownfish) ត្រីទេវតា (angelfish) និងត្រីមេអំបៅ (butterflyfish)។ ការមុជទឹកស្គូបានៅញ៉ាត្រាងនឹងក្លាយជាបទពិសោធន៍ដ៏អស្ចារ្យមួយក្នុងការជួបជាមួយហ្វូងត្រីបារ៉ាគូដា (barracudas) ត្រីត្រាវ៉ាលី (trevallies) និងត្រី snapper ហែលកាត់ ព្រមទាំងអណ្តើកសមុទ្រក្រចកចក្រ (hawksbill turtles) ផងដែរ។ កោះមុន (Mun Island) តំបន់ការពារសមុទ្រហុងមុន (Hon Mun Marine Protected Area) ឬកោះបាឡែន (Whale Island)... គឺជាកន្លែងមុជទឹកស្គូបាដែលអ្នកគួរតែទៅកម្សាន្ត។

នៅពេលទៅលេងតំបន់ការពារសមុទ្រហុងមុន កុំរំលងឱកាសជិះទូកកម្សាន្ត និងស្វែងរកកោះជុំវិញ ឬទៅមុជទឹកមើលផ្កាថ្ម (snorkelling)។

សម្រាប់អ្នកស្រឡាញ់ត្រីបាឡែន កោះបាឡែន (Whale Island) ក្នុងអំឡុងខែមេសា និងកក្កដា នឹងក្លាយជាពេលវេលាដ៏ល្អបំផុតក្នុងការមើលឃើញត្រីបាឡែនហែលកាត់។ សកម្មភាពផ្សេងទៀតដែលត្រូវរីករាយ៖ ការមុជទឹកមើលផ្កាថ្ម (snorkelling) ការជិះទូកកាយ៉ាក ការស្ទូចត្រី ការលេងបាល់ទះ...

 

ភូគុក

កោះនៅឆ្នេរសមុទ្រភាគនិរតីនៃប្រទេសវៀតណាមនេះ ត្រូវបានគេពណ៌នាថាជាឋានសួគ៌លើផែនដី ដែលទាក់ទាញអ្នកចូលចិត្តមុជទឹកស្គូបាមកពីគ្រប់ទិសទីជុំវិញពិភពលោក។ ពេលវេលាដ៏ល្អបំផុតសម្រាប់ការមុជទឹកគឺចាប់ពីខែវិច្ឆិកាដល់ខែឧសភា នៅពេលដែលសមុទ្រមានសភាពស្ងប់ស្ងាត់ និងមានកម្រិតមើលឃើញច្បាស់បំផុត។ ទីតាំងមុជទឹកដ៏ល្អបំផុតមួយចំនួននៅភូគុក រួមមាន កោះអណ្តើក (Turtle Island) កោះហ្វីងហ្គើ (Finger Island) និងប្រជុំកោះអានថយ (An Thoi Archipelago)។ ត្រីមេអំបៅ ត្រីសេក (parrotfish) ត្រីទេវតា សេះសមុទ្រ ត្រីតោ (lionfish) និងសូម្បីតែត្រីបបែល ក៏អាចមើលឃើញនៅក្នុងសមុទ្រពណ៌ខៀវនេះផងដែរ។

ភូគុកមានសកម្មភាពច្រើនជាងការមុជទឹកស្គូបាទៅទៀត ដោយមានសកម្មភាពកម្សាន្តជាច្រើនដូចជា ការស្វែងយល់ពីឆ្នេរសមុទ្រដ៏ស្អាតគ្មានគូប្រៀប ការដើរកម្សាន្តនៅក្នុងឧទ្យានជាតិភូគុក ការជិះទូកកម្សាន្តទៅកាន់ប្រជុំកោះអានថយដែលនៅជិតនោះ ការទទួលទានអាហារសមុទ្រដ៏ឈ្ងុយឆ្ងាញ់ និងការដើរទិញឥវ៉ាន់នៅផ្សាររាត្រីដ៏រស់រវើក។

 

កុងដាវ

ភាពអស្ចារ្យនៃសមុទ្រដ៏ស្អាតគ្មានគូប្រៀបនេះ ស្ថិតនៅលើឆ្នេរសមុទ្រភាគខាងត្បូងនៃប្រទេសវៀតណាម។ វាជាជម្រករបស់អណ្តើកសមុទ្រក្រចកចក្រ ឆ្មាមុទ្រប៉ប្រះទឹក (reef sharks) និងហ្វូងត្រីបារ៉ាគូដា។ ក្នុងអំឡុងខែមីនាដល់ខែកញ្ញា ភ្ញៀវទេសចរអាចគយគន់សួនផ្កាថ្មដ៏រស់រវើកនៅក្រោមទឹកក្បែរកោះបេកាញ់ (Bay Canh Island) កោះហុងតៃ (Hon Tai Island) និងឈូងសមុទ្រកុងសឺន (Con Son Bay)។ អ្នកស្រឡាញ់ធម្មជាតិអាចស្វែងយល់ពីឆ្នេរសមុទ្រនៅក្បែរនោះ ឬដើរកម្សាន្តកាត់ព្រៃឈើដ៏ខៀវស្រងាត់នៃឧទ្យានជាតិកុងដាវ ឬជិះទូកកម្សាន្តដើម្បីរុករកកោះជុំវិញនោះ។

 

ប្រជុំកោះចាម

តំបន់បម្រុងជីវមណ្ឌលរបស់អង្គការយូណេស្កូ (UNESCO Biosphere Reserve) នៅឆ្នេរសមុទ្រហយអាន (Hoi An) (ភាគកណ្តាលប្រទេសវៀតណាម)។ មកកម្សាន្តនៅទីនេះពីខែមេសាដល់ខែកញ្ញា ដើម្បីទទួលបានលក្ខខណ្ឌអំណោយផលបំផុតសម្រាប់ការមុជទឹក។ មានសកម្មភាពជាច្រើនទៀតដែលត្រូវរីករាយនៅលើប្រជុំកោះចាម រួមទាំងការដើរកម្សាន្តតាមបណ្តោយឆ្នេរសមុទ្រដ៏ស្អាតគ្មានគូប្រៀប ការទស្សនាភូមិអ្នកនេសាទក្នុងតំបន់ដើម្បីស្វែងយល់ពីវប្បធម៌ និងការញ៉ាំអាហារសមុទ្រដ៏ឈ្ងុយឆ្ងាញ់ ការដើរកាត់ព្រៃឈើដ៏ខៀវស្រងាត់ដើម្បីស្វែងរកចំណុចមើលទេសភាពលាក់ខ្លួន។ ហុងដាយ (Hon Dai) បាយបាក់ (Bai Bac) និងហុងតៃ (Hon Tai) គឺជាកន្លែងមុជទឹកដ៏ល្អបំផុតមួយចំនួននៅជុំវិញប្រជុំកោះចាម។