បានមកដល់ទីក្រុងហ្វេក្នុងខែសីហា អតីតរាជធានីនៃប្រទេសវៀតណាមបានទទួលស្វាគមន៍ពួកយើងជាមួយនឹងភ្លៀងរលឹមស្រិចៗ និងក្លិនដែលមិត្តភក្តិរបស់ខ្ញុំហៅថា «ក្លិនពិតៗរបស់ហ្វេ»។ ខុសប្លែកទាំងស្រុងពីភាពអ៊ូអរ និងអកូឡាកាលនៃទីក្រុងហាណូយ ផ្លូវនានាក្នុងទីក្រុងហ្វេមានភាពស្ងប់ស្ងាត់ ដោយកម្រមានសំឡេងស៊ីផ្លេយានយន្តណាស់។ ទន្លេទឹកអប់បានបក់នាំយកភាពតានតឹង និងភាពនឿយហត់នៃការ «រកប្រាក់ចិញ្ចឹមជីវិត» របស់ពួកយើងទៅបាត់អស់។

មនុស្សដែលមកលេងទីក្រុងហ្វេជាលើកដំបូងនឹងមានអារម្មណ៍រំភើប ហើយពេលខ្លះក៏ស្វែងរកឃើញភាពស្ងប់ស្ងាត់នៅក្នុងទីក្រុងនេះ ពេលធ្វើដំណើរឆ្លងកាត់ទីកន្លែងនានាដែលគេងាយនឹងស្គាល់ឈ្មោះ៖ ព្រះបរមរាជវាំងតាំងពីសម័យរាជវង្សង្វៀន ផ្នូរអធិរាជបុរាណ ប្រាសាទព្រះនាងហ្វៀនត្រាន ទន្លេទឹកអប់ វត្តធៀនមូ សារមន្ទីរវត្ថុបុរាណរាជវាំងហ្វេ... ទោះជាយ៉ាងណាក៏ដោយ ភាពប្រណីតនៃរាជវាំងទាំងអស់នេះហាក់ដូចជាកំពុងបិទបាំងសិល្បៈដ៏អស្ចារ្យមួយហៅថា ញ៉ាញ៉ាក់ (Nha Nhac) - តន្ត្រីព្រះរាជទ្រព្យវៀតណាម ដែលជាស្នាដៃឯករបស់ទីក្រុងហ្វេនិយាយដោយឡែក និងប្រទេសវៀតណាមនិយាយជារួម។

«ញ៉ាញ៉ាក់» (Nha Nhac - តន្ត្រីព្រះរាជទ្រព្យវៀតណាម) ដែលត្រូវបានទទួលស្គាល់ដោយអង្គការយូណេស្កូជាបេតិកភណ្ឌវប្បធម៌ពិភពលោក គឺជាទម្រង់សិល្បៈពិសេសមួយនៃរាជធានីហ្វេ ក្នុងខេត្តធឿធៀន-ហ្វេ ភាគកណ្តាល។

អង្គការយូណេស្កូកំណត់និយមន័យ ញ៉ាញ៉ាក់ ថាជា «តន្ត្រីដ៏ប្រណីត» ដែលរួមមានទម្រង់តន្ត្រី និងរបាំដ៏សម្បូរបែប ដែលត្រូវបានសម្តែងនៅក្នុងព្រះរាជវាំងវៀតណាមចាប់ពីសតវត្សទី១៥ ដល់ពាក់កណ្តាលសតវត្សទី២០។ តន្ត្រីដ៏ប្រណីតនេះ ច្រើនតែត្រូវបានលេងនៅក្នុងពិធីបើក និងបិទកម្មវិធីផ្សេងៗ ពាក់ព័ន្ធនឹងការរំលឹកខួប ពិធីបុណ្យសាសនា ពិធីរាជាភិសេក ពិធីបុណ្យសព និងការទទួលស្វាគមន៍ផ្លូវការ។ នាពេលបច្ចុប្បន្ន តន្ត្រីនេះត្រូវបានសម្តែងនៅក្នុងប្រទេសជាច្រើនក្នុងពិភពលោក ដើម្បីជាការគោរពដល់វប្បធម៌វៀតណាម。

ញ៉ាញ៉ាក់ ត្រូវបានចាត់ទុកជាតន្ត្រីជាតិតែមួយគត់របស់ប្រទេស ក្នុងចំណោមប្រភេទតន្ត្រីវៀតណាមជាច្រើន។ ក្នុងសម័យសក្ដិភូមិ តន្ត្រីព្រះរាជទ្រព្យត្រូវបានលេងដើម្បីជានិមិត្តរូបនៃព្រះជន្មាយុយឺនយូររបស់ព្រះមហាក្សត្រ និងភាពរុងរឿងនៃរាជវង្ស។ ហេតុដូច្នេះហើយ «ញ៉ាញ៉ាក់» ត្រូវបានវាយតម្លៃខ្ពស់បំផុតដោយរបបរាជានិយមវៀតណាម។ នៅក្រោមរាជវង្សង្វៀន ញ៉ាញ៉ាក់ ត្រូវបានសម្តែងក្នុងអំឡុងពេលពិធីបុណ្យសំខាន់ៗរបស់ព្រះរាជវង្សានុវង្ស។

ក្នុងនាមជាទ្រព្យសម្បត្តិដែលមិនអាចកាត់ថ្លៃបានរបស់វៀតណាម ញ៉ាញ៉ាក់ មានវង់តន្ត្រីរាជវាំងផ្ទាល់ខ្លួន ជាមួយនឹងការបង្ហាញឧបករណ៍តន្ត្រីដ៏មានតម្លៃបំផុតរបស់វៀតណាម ដូចជាឧបករណ៍ផ្លុំ ឧបករណ៍ខ្សែ ឧបករណ៍ស្គរ ព្រមទាំងឧបករណ៍ផ្សេងៗទៀត រួមផ្សំជាមួយនឹងចង្វាក់ដ៏សម្បូរបែប និងចម្រៀងដែលមានខ្លឹមសារជ្រាលជ្រៅ។ ការសម្តែង ញ៉ាញ៉ាក់ ក៏មានការចូលរួមពីអ្នកចំរៀង អ្នករាំ និងតន្ត្រីករជាច្រើនរូបដែលគ្រងសម្លៀកបំពាក់យ៉ាងប្រណីតផងដែរ។

តន្ត្រីព្រះរាជទ្រព្យមានបីទម្រង់គឺ ដាយញ៉ាក់ (Dai Nhac) ទីវញ៉ាក់ (Tieu Nhac) (រួមទាំងវង់តន្ត្រី និងបទភ្លេងដែលរក្សាទុកភាគច្រើននៅតាមពិធីបុណ្យប្រជាប្រិយ) និងរបាំព្រះរាជទ្រព្យ។

ការសម្តែងនីមួយៗគឺជាសាច់រឿងប្លែក និងច្នៃប្រឌិត ដែលឆ្លុះបញ្ចាំងពីជីវិត ក្តីសង្ឃឹម និងក្តីស្រមៃរបស់មនុស្សនាសម័យនោះ។ រាល់ការសម្តែងតម្រូវឱ្យអ្នកសម្តែងទាំងអស់រក្សាការយកចិត្តទុកដាក់ខ្ពស់ និងអនុវត្តតាមជំហាននីមួយៗនៃពិធីការយ៉ាងល្អិតល្អន់បំផុត។

របាំផ្លិត តែងតែត្រូវបានសម្តែងថ្វាយព្រះមហេសី ព្រះស្នំ និងព្រះនាងនៃរាជវង្សង្វៀន ក្នុងពិធីលៀងសាយភោជន៍ និងពិធីអាពាហ៍ពិពាហ៍។ របាំនេះសរសើរពីជីវិតស្នេហា ប្រសិទ្ធពរជ័យសម្រាប់ភាពចុះសម្រុងគ្នា និងសុភមង្គលគ្រួសារ។

ការសម្តែងផ្សេងទៀតដូចជា "Huu bien vo hinh" - ការដេញខ្មោច ល្ខោននេះនិយាយអំពីសម័យកាលដែលពិភពលោកពោរពេញទៅដោយបិសាច បំផ្លិចបំផ្លាញ និងធ្វើបាបមនុស្សជាតិ ដោយមិនគិតពីសីលធម៌; 'របាំគោម' - ឬ 'Luc cung hoa dang' គឺជារបាំដែលប្រើក្នុងពិធីសាសនាព្រះពុទ្ធសាសនា ដែលមានការបូជាចំនួនប្រាំមួយដង សម្តែងតាមរយៈរបាំចំនួនប្រាំមួយ ដោយរាល់ដងមានការថ្វាយគ្រឿងបូជាដូចជា៖ ធូប ផ្កា គោម តែ ផ្លែឈើ និងអាហារ។ ក្រោយមកទៀត ត្រូវបានប្រើសម្រាប់ការសម្តែងដើម្បីអបអរសាទរថ្ងៃបុណ្យចម្រើនព្រះជន្មរបស់ព្រះអធិរាជ និងរាជវង្សានុវង្ស។

ពួកយើងមានកិត្តិយសណាស់ដែលបានទស្សនា ញ៉ាញ៉ាក់ នៅក្នុងរោងមហោស្រព យៀត ធី ដឿង (Duyet Thi Duong) ដែលស្ថិតនៅខាងក្នុងព្រះបរមរាជវាំង។ នេះជារោងមហោស្រពដំបូងគេបង្អស់ដែលបើកដើម្បីសម្តែងតន្ត្រីព្រះរាជទ្រព្យ ដែលត្រូវបានសាងសង់ឡើងក្នុងរាជវង្សង្វៀន ជិត ២០០ ឆ្នាំមុន។ នេះក៏ជាកន្លែងសម្តែងដ៏ចំណាស់បំផុតមួយនៅក្នុងប្រទេសវៀតណាម និងជាកន្លែងសម្តែងសិល្បៈជាច្រើនប្រភេទដូចជា ល្ខោនអូប៉េរ៉ា របាំ និងតន្ត្រីរាជវាំងសម្រាប់ខាងក្នុងព្រះរាជវាំងរបស់ព្រះមហាក្សត្រ។ ពួកយើងពិតជាមានការចាប់អារម្មណ៍យ៉ាងខ្លាំងចំពោះទីធ្លាដ៏ស្កឹមស្កៃ ឧឡារិក និងបរិយាកាសដ៏ពិសិដ្ឋនេះ។

ភ្ញៀវទេសចរដែលមកលេងទីក្រុងហ្វេ ក៏អាចរីករាយនឹងតន្ត្រីជាន់ខ្ពស់ប្រភេទនេះផងដែរ ក្នុងអំឡុងពេលជិះទូកកម្សាន្តតាមទន្លេទឹកអប់។ វាពិតជាមានតម្លៃណាស់ក្នុងការទស្សនា ដើម្បីស្វែងយល់ និងស្វែងរកបេតិកភណ្ឌដ៏សម្បូរបែបរបស់ប្រទេសវៀតណាម។