ស្ថិតនៅក្នុងភូមិមីសឺន ឃុំធូប៊ុន ទីក្រុងដាណាំង តំបន់បុរាណដ្ឋានមីសឺន គឺជាសំណង់ស្ថាបត្យកម្មចម្រុះរបស់ប្រជាជនចាមបុរាណ ដែលមានប្រាសាទ និងតួប៉មជាង ៣២ ជាមួយនឹងរចនាបថ «តែមួយគ្មានពីរ» ដែលត្រូវបានរក្សាទុកគង់វង្សរហូតមកដល់សព្វថ្ងៃនេះ។

ការសាងសង់តំបន់ប្រាសាទមីសឺនបានចាប់ផ្ដើមឡើងក្នុងសតវត្សទី ៤ ក្រោមរជ្ជកាលព្រះបាទ Bhadravarman (ដែលសោយរាជ្យពីឆ្នាំ ៣៤៩ ដល់ ៣៦១) និងបានបញ្ចប់នៅចុងសតវត្សទី ១៣ ដល់ដើមសតវត្សទី ១៤ ក្រោមរជ្ជកាលព្រះបាទ Jaya Simhavarman III។

នៅពេលមកទស្សនាតំបន់ប្រាសាទមីសឺន ភ្ញៀវទេសចរអាចទស្សនានូវស្លាកស្នាមប្រវត្តិសាស្ត្រដ៏រុងរឿងនៃរាជវង្សចាមបុរាណ ដែលស្តែងឡើងនៅលើគ្រប់ស្រទាប់ឥដ្ឋ និងរាល់រូបចម្លាក់នីមួយៗដែលបង្ហាញពីជីវភាពរស់នៅរបស់សហគមន៍ និងសាសនា។

ប្រាសាទទាំងឡាយនៅទីនេះត្រូវបានសាងសង់ឡើងយ៉ាងផ្ចិតផ្ចង់បំផុត ជាមួយនឹងចម្លាក់ដ៏ប្រណិត និងប្លែកពីគេ។ លក្ខណៈពិសេសគួរឱ្យកត់សម្គាល់បំផុតនោះគឺបច្ចេកទេសសាងសង់ ដោយឥដ្ឋនីមួយៗត្រូវបានដុត និងកាត់ជាប្លុកយ៉ាងជាក់លាក់ ហើយតម្រៀបជម្រួតលើគ្នាដោយមិនប្រើសារធាតុស្អិតណាមួយឡើយ។ ទោះបីជាត្រូវឆ្លងកាត់ការប្រែប្រួលអាកាសធាតុធម្មជាតិអស់ជាច្រើនសតវត្សមកហើយក្តី ក៏សំណង់ទាំងនេះនៅតែរក្សាបាននូវភាពដើមដដែល ដែលនេះជាអាថ៌កំបាំងមិនទាន់មានការបកស្រាយនៅឡើយ។ ដោយសារតម្លៃវប្បធម៌ដ៏វិសេសវិសាលនេះ តំបន់ប្រាសាទមីសឺនត្រូវបានអង្គការយូណេស្កូ (UNESCO) ទទួលស្គាល់ជាបេតិកភណ្ឌវប្បធម៌ពិភពលោកក្នុងឆ្នាំ ១៩៩៩។

ដោយមានវិសាលភាពត្រឹមតែ ២ គីឡូម៉ែត្រប៉ុណ្ណោះ តំបន់ប្រាសាទមីសឺនត្រូវបានហ៊ុមព័ទ្ធទាំងស្រុងនៅក្នុងជ្រលងភ្នំដ៏ស្ងប់ស្ងាត់មួយ ដែលព័ទ្ធជុំវិញដោយជួរភ្នំដ៏អស្ចារ្យ។ ច្រកចូលសំខាន់នាំទៅដល់តំបន់កណ្តាលតាមរយៈផ្លូវដើរប្រវែង ១ គីឡូម៉ែត្រ។ សម្រាប់អ្នកដែលមិនចង់ដើរ ក៏មានរថយន្តអគ្គិសនីសម្រាប់ដឹកជញ្ជូនផងដែរ។ មគ្គុទ្ទេសក៍ទេសចរណ៍ដែលអាចនិយាយបានច្រើនភាសាតែងតែត្រៀមខ្លួនជាស្រេចដើម្បីជួយសម្រួលដល់ភ្ញៀវទេសចរដែលចង់ស្វែងយល់អំពីប្រវត្តិនៃតំបន់ប្រាសាទមីសឺន។

ថ្មីៗនេះ វត្ថុបុរាណជាង ១,៦០០ ក្នុងចំណោម ១,៨០០ ដែលបានរកឃើញនៅតំបន់ប្រាសាទមីសឺន ត្រូវបានបញ្ចូលទៅក្នុងប្រព័ន្ធឌីជីថល។ គ្រប់ផ្នែកទាំងអស់នៃតំបន់នេះត្រូវបានបំពាក់ដោយកូដ QR និងឧបករណ៍ណែនាំជាសំឡេងស្វ័យប្រវត្តិចំនួន ៦ ភាសា (វៀតណាម អង់គ្លេស បារាំង កូរ៉េ ជប៉ុន និងចិន)។ តម្លៃសំបុត្រចូលទស្សនាគឺសមរម្យណាស់។