ក្វាងនិញ ប្រទេសវៀតណាម (ថ្ងៃទី២២ ខែមិថុនា ឆ្នាំ២០១៨) -- ក្រុមហ៊ុនប្រតិបត្តិករទេសចរណ៍ឈានមុខ និស្សិត និងអង្គការមិនមែនរដ្ឋាភិបាលនានា បានចាប់ដៃគ្នា កាលពីសប្តាហ៍មុន ក្នុងកម្មវិធី «សកម្មភាពដើម្បីឈូងសមុទ្រហាឡុងបៃតង» (Action for a Green Ha Long) ដែលជាព្រឹត្តិការណ៍សម្អាតបរិស្ថានលើកទី៤ រៀបចំឡើងដោយក្រុមហ៊ុន Bhaya Group និងដៃគូនានា នៅឈូងសមុទ្រហាឡុងបៃ។

ព្រឹត្តិការណ៍នេះត្រូវបានធ្វើឡើងនៅថ្ងៃទី១៤ ខែមិថុនា ដោយមានភាពខុសប្លែកពីឆ្នាំមុនៗ ត្រង់ការសង្កត់ធ្ងន់ទៅលើការបណ្តុះបណ្តាលអំពីគោលការណ៍គ្មានកាកសំណល់ សម្រាប់សមាជិកនៃឧស្សាហកម្មទេសចរណ៍ ដែលត្រូវបានលើកទឹកចិត្តឱ្យបញ្ចូលការអនុវត្តល្អៗបំផុតទាំងនេះ ទៅក្នុងប្រតិបត្តិការប្រចាំថ្ងៃរបស់ពួកគេ។

សកម្មភាពនាថ្ងៃនោះ ត្រូវបានដឹកនាំដោយសហភាពអភិរក្សធម្មជាតិ (Union for Conservation of Nature), អង្គការ Live and Learn, មជ្ឈមណ្ឌលគាំទ្រការអភិវឌ្ឍន៍បៃតង (Centre for Supporting Green Development) និងក្រុមហ៊ុន Bhaya Group ព្រមទាំងទទួលបានការគាំទ្រពីសម្ព័ន្ធ Ha Long-Cat Ba Alliance ដែលជាគំនិតផ្តួចផ្តើមផ្តល់ហិរញ្ញប្បទានដោយទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID)។

ការកើនឡើងនៃចំនួនភ្ញៀវទេសចរនៅក្នុងតំបន់បេតិកភណ្ឌពិភពលោករបស់អង្គការយូណេស្កូមួយនេះ បាននាំឱ្យមានផលប៉ះពាល់បរិស្ថានកាន់តែខ្លាំងឡើងនៅក្នុងឈូងសមុទ្រជារៀងរាល់ឆ្នាំ។ ក្រុមហ៊ុន Bhaya Group ដែលជាម្ចាស់ និងប្រតិបត្តិករនាវាទេសចរណ៍កម្សាន្តជាច្រើននៅក្នុងឈូងសមុទ្រហាឡុងបៃ បានបង្កើតព្រឹត្តិការណ៍ «សកម្មភាពដើម្បីឈូងសមុទ្រហាឡុងបៃតង» ឡើង ដើម្បីជាវិធីមួយក្នុងការលើកកម្ពស់ការយល់ដឹង និងជំរុញសកម្មភាពការពារសម្រស់ធម្មជាតិនៃឈូងសមុទ្រនេះ។ ព្រឹត្តិការណ៍នេះបានប្រមូល និងកម្ចាត់កាកសំណល់ជាង ៤តោន ចេញពីឈូងសមុទ្រចាប់តាំងពីការចាប់ផ្តើមដំបូងមក។

មុនពេលការសម្អាតចាប់ផ្តើម តំណាងមកពីស្ថាប័ននីមួយៗបានជួបជុំគ្នានៅការិយាល័យរបស់ក្រុមហ៊ុន Bhaya Group ក្នុងកំពង់ផែ Tuan Chau ដើម្បីពិភាក្សាអប់រំអំពីប្រភេទសម្រាម គំនិតក្នុងការកាត់បន្ថយសម្រាម និងសារៈសំខាន់នៃការគ្រប់គ្រងកាកសំណល់ក្នុងឧស្សាហកម្មទេសចរណ៍។ កិច្ចប្រជុំដ៏មានអត្ថន័យនេះបានផ្តល់ជាមូលដ្ឋានគ្រឹះដ៏រឹងមាំសម្រាប់សកម្មភាពពេញមួយថ្ងៃនោះ។

អ្នកស្ម័គ្រចិត្តជាង ១០០នាក់ បានឡើងលើនាវាកម្សាន្ត Au Co Luxury ហើយក្រោយមកបានបំបែកគ្នាដើម្បីប្រមូលកាកសំណល់ពីឆ្នេរដាច់ស្រយាលចំនួនពីរនៅចុងបំផុតនៃឈូងសមុទ្រ មុនពេលបែងចែកប្រភេទសម្រាមដើម្បីវាយតម្លៃរកប្រភេទសម្ភារៈដែលត្រូវបានរកឃើញច្រើនជាងគេ។ សម្រាមប្រមាណ ៧៤១គីឡូក្រាម ត្រូវបានប្រមូលដោយអ្នកស្ម័គ្រចិត្ត ដែលបានរកឃើញថា សារធាតុប៉ូលីស្ទីរ៉ែន និងផ្លាស្ទិកប្រើប្រាស់តែម្តង រួមចំណែកច្រើនជាងគេបំផុតនៃសម្រាមដែលរកឃើញនៅក្នុងឈូងសមុទ្រ។

សកម្មភាពការងារពេញមួយថ្ងៃនោះបានជះឥទ្ធិពលយ៉ាងខ្លាំងដល់អ្នកស្ម័គ្រចិត្ត ដោយបានជំរុញទឹកចិត្តមនុស្សជាច្រើនឱ្យរួមគ្នាធ្វើការឆ្ពោះទៅរកការកាត់បន្ថយកាកសំណល់ និងបង្កើននិរន្តរភាពកាន់តែខ្លាំងសម្រាប់អនាគតនៃឈូងសមុទ្រហាឡុងបៃ និងភ្ញៀវទេសចររបស់ខ្លួន។

 

###

---