ស្លាកសញ្ញា ‘Giải khát’ មាននៅពាសពេញប្រទេសវៀតណាម ដោយអញ្ជើញមនុស្សគ្រប់ស្រទាប់វណ្ណៈឱ្យមក ‘កាត់បន្ថយការស្រេកទឹក’។ ប្រទេសនេះអាចនឹងត្រូវបានគេស្គាល់ថាជា ឋានសួគ៌របស់អ្នកចូលចិត្តញ៉ាំអាហារ ប៉ុន្តែភេសជ្ជៈរបស់វាក៏មានរសជាតិឆ្ងាញ់មិនចាញ់ម្ហូបអាហាររបស់ខ្លួនដែរ។ ការឈប់សម្រាកដើម្បីពិសារភេសជ្ជៈ គឺដូចជាការជួបជុំគ្នាដ៏ពិសេសមួយ៖ ពេលវេលាដើម្បីសម្រាកនៅលើចិញ្ចើមផ្លូវ និងជជែកកំសាន្ត។ មិនថាអ្នកទៅទីណាក្នុងប្រទេសវៀតណាមទេ ភេសជ្ជៈដែលជួយឱ្យមានកម្លាំងឡើងវិញគឺមិននៅឆ្ងាយឡើយ។ ខាងក្រោមនេះជាភេសជ្ជៈដ៏ឆ្នើមទាំង ៧ មុខសម្រាប់បញ្ជីរបស់អ្នក។

---

Cà phê sữa đá

កាហ្វេមួយកែវតាមបែបវៀតណាម នឹងធ្វើឱ្យអ្នកមានស្មារតីស្រឡះ និងស្វាហាប់។ គ្រាប់កាហ្វេ robusta របស់វៀតណាម បង្កើតបានជាកាហ្វេដ៏ខ្លាំងក្លា ជាមួយនឹងរសជាតិឈ្ងុយឆ្ងាញ់ និងដិតជាប់ចិត្ត ដែលធ្វើឱ្យអ្នកឆាប់ជក់ចិត្តដកកាយមិនរួច។ Cà phê sữa đá គឺជាការលាយបញ្ចូលគ្នារវាងកាហ្វេតម្រងតក់ (drip-filter) ជាមួយទឹកដោះគោខាប់ និងទឹកកកយ៉ាងច្រើនដើម្បីឱ្យមានរសជាតិស្រទន់។

---

Nước mía

ភេសជ្ជៈដែលមានជាតិស្ករ ប៉ុន្តែក៏ល្អចំពោះសុខភាព? Nước mía ឬទឹកអំពៅ គឺជាការភ្ញាក់ផ្អើលដ៏រីករាយសម្រាប់អ្នកដំណើរភាគច្រើន។ អ្នកលក់កិនដើមអំពៅយឺតៗតាមម៉ាស៊ីនកិន ដើម្បីច្របាច់យកទឹកដ៏ផ្អែមល្ហែម។ ច្របាច់ក្រូចឆ្មារបន្តិច ហើយទទួលទានជាមួយទឹកកក ដើម្បីទទួលបានថាមពលពីធម្មជាតិឡើងវិញ។

---

Trà quất 

បន្ទាប់ពីដើរកម្សាន្តក្រោមពន្លឺថ្ងៃរួចមក គួរសម្រាកនៅហាងកាហ្វេជាមួយ Trà quất មួយកែវ។ តែទឹកកកដ៏សាមញ្ញមួយដែលមានរសជាតិក្រូចឆ្មារ និងទឹកឃ្មុំ ភេសជ្ជៈដ៏មានរសជាតិនេះនឹងជួយឱ្យអ្នកមានកម្លាំងឡើងវិញភ្លាមៗ។ អ្នកថែមទាំងអាចរកវាបាននៅតាមហាងកាហ្វេល្បីៗដូចជា Cong Ca Phe និង The Coffee House ផងដែរ។

---

---

Sinh tố

ជនជាតិវៀតណាមគឺជាអ្នកជំនាញក្នុងការកែច្នៃគ្រឿងផ្សំស្រស់ៗឱ្យទៅជាអាហារសម្រន់ដ៏ពិសេស។ Sinh tố គឺជាឧទាហរណ៍មួយក្នុងចំណោមនោះ៖ ការលាយបញ្ចូលគ្នាយ៉ាងឆ្ងាញ់ពិសានៃផ្លែឈើត្រូពិច -- ស្រកានាគ ចេក ម្នាស់ ស្វាយ បឺរ និងផ្លែឈើដទៃទៀត -- ក្រឡុកជាមួយទឹកកក និងទឹកដោះគោខាប់បន្តិច។ 

---

Chanh tuyết 

កែវត្រជាក់ស្រេបដែលពោរពេញទៅដោយ ‘ទឹកកកក្រូចឆ្មារ’ ជូរអែម គឺជាអ្វីដែលធ្វើឱ្យ Chanh tuyết ក្លាយជាភេសជ្ជៈដ៏ឆ្ងាញ់ពិសាអស្ចារ្យ។ ផ្សំឡើងពីទឹកកក ទឹកក្រូចឆ្មារ សំបកក្រូចឆ្មារកោស និងស្ករបន្តិច វាត្រូវបានបម្រើជូនជាមួយទុយោ និងស្លាបព្រាដើម្បីឱ្យអ្នកងាយស្រួលទទួលទាន។ ស្វែងរកវាបាននៅតាមហាងកាហ្វេនានាទូទាំងប្រទេស។

---

Trà đá

មិនថាអ្នកនៅទីណាឡើយ តូបលក់ Trà đá គឺនៅជិតបង្កើយ។ ប្រសិនបើអ្នកឃើញកៅអីជ័រតូចៗ និងកែវទឹកតម្រៀបគ្នាជាក្រុមនៅប្រទេសវៀតណាម អ្នកអាចប្រាកដណាស់ថាពួកគេលក់តែបៃតងទឹកកកនេះហើយ។ ដើម្បីទទួលបានរសជាតិដូចអ្នកស្រុកពិតៗ គួរកុម្ម៉ង់មួយកែវជាមួយអាហារតាមចិញ្ចើមផ្លូវរបស់អ្នកនៅពេលអាហារថ្ងៃត្រង់ ឬអាហារពេលល្ងាច។ 

---

Bia hơi

ទាញកៅអីអង្គុយនៅហាងស្រាបៀរណាមួយក្នុងភាគខាងជើងនៃប្រទេសវៀតណាម ហើយអ្នកនឹងទទួលបានកែវដ៏ធ្ងន់មួយនៃស្រាបៀរ Bia hơi ពណ៌មាសដែលមានពពុះច្រើន។ ស្រាបៀរស្រស់ដែលមិនបានឆ្លងកាត់ការសម្លាប់មេរោគ (unpasteurised) នេះគឺស័ក្តិសមបំផុតក្នុងការញ៉ាំជាមួយសណ្តែកដី អាហារសម្រន់បំពង ឬអាហារពេលល្ងាចជាលក្ខណៈគ្រួសារដ៏ធំ។ អ្វីដែលល្អបំផុតនោះគឺ មួយកែវដែលមានពពុះហុយៗនេះមានតម្លៃត្រឹមតែ 8,000VND ប៉ុណ្ណោះ។ ជល់កែវ!

---

ចង់បានគំនិតធ្វើដំណើរក្នុងប្រទេសវៀតណាមបន្ថែមទៀតទេ? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានរឿងរ៉ាវល្អៗបំផុតនៅក្នុងប្រអប់សំបុត្ររបស់អ្នក។

---