ភូគុក គឺជាកោះរាងត្រីកោណមួយនៅភាគខាងត្បូងនៃប្រទេសវៀតណាម ដែលជាដែនដីនៃឆ្នេរខ្សាច់សដ៏ស្រស់ស្អាត និងអាហារសមុទ្រស្រស់ៗគួរឱ្យចង់ទទួលទាន។ ជនជាតិវៀតណាមស្គាល់ ភូគុក ភាគច្រើនដោយសារទឹកត្រីមានគុណភាពខ្ពស់ និងម្រេចខ្មៅដ៏មានក្លិនក្រអូប។

បរិយាកាសភូមិអ្នកនេសាទនៅតែអាចរកឃើញនៅតាមកន្លែងជាច្រើននៅលើកោះនេះ ដែលទូកលាបពណ៌ស្រស់ៗអណ្តែតលើទឹក ហ៊ុំព័ទ្ធទៅដោយដើមដូងខ្ពស់ៗ។ ទោះជាយ៉ាងណាក៏ដោយ ក្នុងរយៈពេលប៉ុន្មានឆ្នាំចុងក្រោយនេះ ភូគុកបានទាក់ទាញចំណាប់អារម្មណ៍របស់អ្នកទេសចរដែលចូលចិត្តកម្ដៅថ្ងៃ ដែលមិនចេះធុញទ្រាន់នឹងទឹកសមុទ្រដ៏កក់ក្តៅ និងទេសភាពឆ្នេរសមុទ្ររបស់វា។ នេះជាមូលហេតុល្អៗមួយចំនួនដែលអ្នកគួរមកទស្សនាទីនេះ។

---

ឆ្នេរតូចធំចម្រុះ

តាមពិតទៅ ភូគុក គឺជាកោះធំមួយ (ពិតជាកោះធំបំផុតនៅក្នុងប្រទេសវៀតណាម) រួមទាំងកោះតូចៗចំនួន ២១ ផ្សេងទៀត។ កុំភ្លេចជួលទូក ឬចូលរួមដំណើរកម្សាន្តដើម្បីទៅ មុជទឹកមើលផ្កាថ្មនៅប្រជុំកោះ អានថយ (An Thoi) នៅភាគខាងត្បូង ដែលមានឆ្នេរខ្សាច់ស្រស់ស្អាត និងថ្មប៉ប្រះទឹកក្រោមទឹកកំពុងរង់ចាំអ្នក។ នៅលើកោះធំ មានឆ្នេរជាច្រើនរាប់មិនអស់សម្រាប់ជ្រើសរើស ទៅតាមចំណង់ចំណូលចិត្តរបស់អ្នក។

បាយសៅ (Bai Sao) គឺជាឆ្នេរខ្សាច់ដ៏ពេញនិយមដែលមានទាំងតំបន់សាធារណៈ និងឯកជន ព្រមទាំងមានភោជនីយដ្ឋានក្នុងស្រុកដែលបម្រើដូងខ្ចីត្រជាក់ៗ និងអាហារសមុទ្រអាំង។ ប្រសិនបើអ្នកចូលចិត្តភាពស្ងប់ស្ងាត់ សូមធ្វើដំណើរទៅកាន់ វុងបាវ (Vung Bau) នៅឆ្នេរខាងលិច ដែលអ្នកអាចរីករាយជាមួយកន្លែងផ្ទាល់ខ្លួន។ អុងឡាង (Ong Lang) គឺជាឆ្នេរដ៏វែងស្អាតស្អំស័ក្តិសមបំផុតសម្រាប់ក្រុមគ្រួសារ ឆ្នេរ កាញ់ដៅ (Ganh Dau) គឺជាកន្លែងសម្ងាត់មួយនៅភាគខាងជើងនៃកោះ ហើយ បៀនបាកែវ (Bien Ba Keo) គឺល្អបំផុតសម្រាប់ការទស្សនាថ្ងៃលិច។ ជ្រើសរើសតាមចិត្តរបស់អ្នក។

---

ការទទួលទានអាហារសមុទ្រ

លំហសមុទ្រដ៏សម្បូរបែបជុំវិញកោះភូគុក គឺជាប្រភពជីវភាពដ៏សំខាន់សម្រាប់គ្រួសារអ្នកនេសាទនៅលើកោះនេះ។ អ្នកនេសាទជាច្រើនចាប់ត្រីអានសូវីដែលត្រូវបានកែច្នៃយ៉ាងយកចិត្តទុកដាក់ទៅជាទឹកត្រីដ៏ល្បីល្បាញរបស់កោះនេះ។

ភ្ញៀវទេសចរក៏ទទួលបានអត្ថប្រយោជន៍ពីភាពសម្បូរបែបនៃសមុទ្រផងដែរ នៅពេលស្នាក់នៅលើកោះភូគុក។ សូមទាញយកប្រយោជន៍ក្នុងអំឡុងពេលធ្វើដំណើររបស់អ្នកជាមួយ ការទទួលទានអាហារថ្ងៃត្រង់នៅក្នុងភោជនីយដ្ឋានបណ្តែតទឹក លើផ្ទៃទឹក និងការទៅទស្សនាផ្សាររាត្រីដ៏អ៊ូអរសម្រាប់ អាហារពេលល្ងាចដ៏មិនអាចបំភ្លេចបានជាមួយអាហារសមុទ្រអាំង។ 

---

កាប៊ីនខ្សែកាប Sun World

ហនធំ (Hon Thom) ឬកោះម្នាស់ ត្រូវបានតភ្ជាប់ទៅនឹងដីគោកដោយខ្សែកាបកាប៊ីនប្រវែងប្រាំបីគីឡូម៉ែត្រ ដែលជាខ្សែកាបវែងបំផុតមួយនៅក្នុងពិភពលោក។ កុំចាកចេញពីភូគុកដោយមិនបានជិះកាប៊ីនខ្សែកាបដ៏អស្ចារ្យនេះ ដែលមានរយៈពេលប្រហែល ១៥ នាទីសម្រាប់ជើងទៅតែម្ខាង។ កាប៊ីនខ្សែកាប Sun World មានបង្អួចកញ្ចក់ធំៗ ដូច្នេះអ្នកអាចគយគន់ទូកនេសាទ កោះព្រៃឈើ និងសមុទ្រពណ៌ខៀវស្រងាត់នៅខាងក្រោមយ៉ាងស្រស់ស្អាត។ នៅលើកោះនេះ អ្នកអាចជិះឡានក្រុងឥតគិតថ្លៃទៅកាន់ឆ្នេរ ហនធំ ដើម្បីចុះលេងទឹកសមុទ្រ។

គន្លឹះ៖ មានឡានក្រុងឥតគិតថ្លៃរត់ទៅកាន់ស្ថានីយកាប៊ីនខ្សែកាបពីសណ្ឋាគារនានានៅជុំវិញទីប្រជុំជន ដួងដុង (Duong Dong)។ សណ្ឋាគាររបស់អ្នកអាចជួយអ្នកស្វែងរកកាលវិភាគ និងចំណុចទទួលភ្ញៀវបាន។

---

សួនកម្សាន្តសម្រាប់គ្រួសារ

ប្រសិនបើអ្នកមកកម្សាន្តនៅភូគុកជាមួយក្រុមគ្រួសាររបស់អ្នក អ្នកនឹងរីករាយដែលបានដឹងថាកោះនេះត្រូវបានរៀបចំឡើងយ៉ាងល្អឥតខ្ចោះជាមួយនឹងសកម្មភាពសម្រាប់គ្រប់វ័យ។ យើងសូមណែនាំឱ្យចំណាយពេលមួយរសៀលនៅសួនទឹក និងសួនកម្សាន្តនៅ VinWonders Phu Quoc។

សំបុត្រមួយសន្លឹកអនុញ្ញាតឱ្យអ្នកចូលលេងកម្សាន្តទូទាំងសួនទាំងមូល រួមទាំងការលេងល្បែងកម្សាន្តមិនកំណត់ ភាពយន្ត 5D ហ្គេមក្នុងផ្ទះ និងការសម្តែងបាញ់ទឹកតន្ត្រី។ វីនភើល (Vinpearl) ក៏មានដំណើរការសួនសត្វសាហ្វារី និងទីលានវាយកូនហ្គោលនៅជិតនោះផងដែរ។

---

ដំណើរកម្សាន្តស្វែងយល់ពីកោះ

ជាប្រពៃណី ភូគុកត្រូវបានគេស្គាល់ថាជាដែនដីនៃទឹកត្រី និងផលិតផលម្រេចខ្មៅ ប៉ុន្តែមានរឿងរ៉ាវជាច្រើនទៀតនៅលើកោះនេះដែលលើសពីអ្វីដែលអ្នកបានឃើញដំបូងទៅទៀត។ ឧទ្យានជាតិ ដ៏ធំមួយគ្របដណ្តប់លើផ្នែកខ្លះនៃកោះ ហើយអ្នកអាចជិះទូកកាយ៉ាក់នៅលើដងទន្លេ គូកាន (Cua Can) ឬដើរកម្សាន្តបែបធម្មជាតិនៅក្នុងព្រៃដើម្បីទស្សនាដើមឈើបុរាណៗ។

កសិដ្ឋានជាច្រើននៅលើកោះនេះ ដូចជា Phu Quoc Countryside និង Phu Quoc Bee Farm ស្វាគមន៍ភ្ញៀវទេសចរណ៍ជាមួយនឹងដំណើរកម្សាន្តដែលមានមគ្គុទ្ទេសក៍នាំផ្លូវ និងការភ្លក់រសជាតិដ៏រីករាយ។ រួមបញ្ចូលគ្នានូវតំបន់ទាក់ទាញនានាជាមួយដំណើរកម្សាន្តតាមម៉ូតូ ឬឡាន jeep ដើម្បីទស្សនាកន្លែងលាក់ខ្លួនជុំវិញកោះ និងធ្វើដំណើរតាមល្បឿនផ្ទាល់ខ្លួនរបស់អ្នក។ 

---

រមណីយដ្ឋានលំដាប់ផ្កាយប្រាំ

ប្រសិនបើអ្នកជាមនុស្សដែលចូលចិត្តភាពប្រណិតក្នុងអំឡុងពេលវិស្សមកាលរបស់អ្នក ភូកុកនឹងផ្តល់ឱកាសយ៉ាងច្រើនដល់អ្នកក្នុងការរីករាយ។ រមណីយដ្ឋានដែលឈ្នះពានរង្វាន់បានគ្រប់គ្រងជ្រុងដ៏ស្រស់ស្អាតបំផុតនៃកោះ ហើយមានជម្រើសដ៏ល្អៗជាច្រើនសម្រាប់ជ្រើសរើស ចាប់ពី JW Marriott Phu Quoc ដែលមានប្រធានបទបែបសាកលវិទ្យាល័យ ទៅដល់បឹងហ្គាឡូដែលហ៊ុមព័ទ្ធដោយធម្មជាតិនៅ Nam Nghi Resort និងវីឡាបែបថែទាំសុខភាពនៅ Fusion Maia។

គន្លឹះ៖ Chanterelle Spa  ដែលមានប្រធានបទ Alice in Wonderland នៅ JW Marriott បានឈ្នះពានរង្វាន់ស្ប៉ាថ្មីឈានមុខគេលើពិភពលោក (World’s Leading New Spa) នៅកម្មវិធី World Luxury Awards ក្នុងឆ្នាំ ២០១៧។ កក់ការម៉ាស្សាព្យាបាលដើម្បីដឹងថាហេតុអ្វីបានជាវាល្បីល្បាញខ្លាំង។ 

---

បារមាត់ឆ្នេរដែលជាគោលដៅទេសចរណ៍

គ្មានកន្លែងណាផ្សេងនៅលើកោះភូកុកដូចជា Sailing Club នោះទេ។ ជាកន្លែងដ៏ប្រណិតមួយដែលមានទីតាំងនៅលើឆ្នេរ Long Beach ដ៏ស្អាតឥតខ្ចោះ Sailing Club Phu Quoc មានមោទនភាពចំពោះមុខម្ហូបដ៏គួរឱ្យចង់ញ៉ាំ ក៏ដូចជាកម្មវិធីតន្ត្រី និងភេសជ្ជៈដែលឆុងយ៉ាងល្អឥតខ្ចោះផងដែរ។ អញ្ជើញមកដើម្បីទទួលទានអាហារពេលព្រឹកដ៏មានសុខភាពល្អ ហែលទឹកកម្សាន្តនៅក្នុងអាងទឹកគ្មានព្រំដែន និងស្នាក់នៅបន្តិចទៀតដើម្បីទស្សនាការសម្តែងរបាំភ្លើងនៅម៉ោង ៧:៣០ យប់។ 

ការទាក់ទាញដ៏ពេញនិយមមួយផ្សេងទៀតសម្រាប់អ្នកចូលចិត្តបារគឺ Rock Island Club ដែលស្ថិតនៅលើកោះតូចមួយជិះទូកត្រឹមតែពីរនាទីប៉ុណ្ណោះពីកោះធំ។ ទិញសំបុត្រនៅរមណីយដ្ឋាន Nam Nghi សម្រាប់ពេលល្ងាចដ៏រីករាយបំផុត។ ជ្រើសរើសរវាងកៅអីអង្គុយនៅលើផ្ទាំងថ្ម កៅអីពូក (bean bags) នៅលើដេកឈើ ឬសាឡុងផ្តៅ -- ទាំងអស់នេះត្រូវបានរៀបចំឡើងសម្រាប់ការទស្សនាថ្ងៃលិចដ៏ស្រស់ស្អាតនៅតំបន់ត្រូពិកនៃកោះភូកុក។ 

---

ចង់បានគំនិតធ្វើដំណើរទៅវៀតណាមបន្ថែមទៀតទេ? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានរឿងរ៉ាវល្អៗបំផុតរបស់យើងនៅក្នុងប្រអប់សំបុត្ររបស់អ្នក។